Miriam hih ibai bangin ring no nia, Pathian bâia thu suak tinrêngin kêng ring an ti (Dânnikna 8:2-3)

25.4.2020

“Miriam hih ibai bangin ring no nia, Pathian bâia thu tinreng isuakin kêng ring an ti” iti thu ringai ei la ei nuama. Pathianin Ama anga a ne isiam ai nit angkan taksa in-loi-vangsakna khelah Pathian thu ei ringna tak a nit iti thu ngaitua ei la ei inuam a nit. “Miriam hih ibai bangin ring no nia, Pathian bâia thu suak tinrêngin kêng ring an ti” iti thu hih ei Pumapa Jisua Krista ṭongbaisuak ngei a nit. 

RICHANG:

A thupêkhei khah nin zôm rang neh rang no; nin lungril riatna ranga fianan dengtheinahei a tir a, ramchârah kum sômilika sung PUMAPA nin Pathianin nangni ân rivâk vêl dân khah reh mai rei. Miriam hih ibai bangin ring no nia, PUMAPA baia thu tinrêng isuakin keng an iring ngai a nit iti nangni ân riat theina rangin vonṭâm dengthei nangni ân tuang a; khanungchu, nin lai riat ngai ino, nin pi neh puhei khomin an lai riat ngai ino Manna-ah khan nangni a vâi a.

Khanniseh, Jisuan a ziangah, “Pathian Thubûn, ‘Miriam hih ibai bangin ring no nia, Pathian bâia rithoka thu suak tinrêngin kêng ring an ti,’ ai ti a nit,” itin a sâm a.

Ifâk rimang thei zel rizûlin rivâk rivâk no unla, kumtluang ringna dai rang ifâk rizûlin rivâk lem rei. Kha fâk khah Miriam Naipan nangni pêng a ti, Pa Pathianin ani khah risin ai sia tâk a nit,” a ti a.

Rengpa Jehova, Ruaitun thang,

Ram rithiang ne thlun inla;

Keimah ker zala, ne santu,

Ni kut chantiang ne tuh roh.

Ringna baiin,

Ki nuam e, ne fâ mai roh.

Tuifim tak kuang ne ong pêk roh,

Ringna tui inluang inla;

Hi ramchârah ke vâi sungin,

Nangman ne ruai mai inla.

Minringpu rât,

Ker tha neh ke pho ni nit.

Jordan tuipui ki tlung tikin,

Lungzing, thlavâi inboi roh;

Ki ram tûng, Kanan rithiang khah,

Râifânin ne khâi inla.

Inpâkna la,

Ni ziangah sak tâng ki ti.

I-ONGNA:

Pathianin Ama anga ai siam Evi neh Adama kha Eden rikul a Pathian neh ripôl maia om ngai an nit a. Eden rikula thei hei ifan an ring ngai iti Riphutna ah ei mu a (Riphutna 3: 23-24). Pathianin fah loi rang ai ti sia neh ṭha riatna thing irâ an fâk sika Eden rikul ata ûm isua omin loisin itho a ifâk ifah rang tâkin Pathianin ai ti a nit.

Khatika chu ringna thing irâ khom an ifâk thei khâi ino a nit a. Hi ringna thing irâ miriamin ei fâk nôk thei rang zoro chu Pathianin ânrifûk a. Thuphuang 22:14 ah Pumapa Jisua Krista zuang nôk tikah an puan risûnfaihei chu khopui sunga lûtin ringna thingkunga thei irâ an la ifâk nôk thei rang a nit iti ei imu a nit.

Pathianin thilsiam tinreng neh Ama anga miriam ai siam chu a siam zoin a en a ṭha a ti ok a. Khan miriam Ama anga ai siam hein a thupek an zômno sikin Pathian ningthik an itongin miriam neh thilsiamhei chu Pathian ningthikna nuaiah an i-om tâk a nit. Miriamin Pathian ningthikna nuaia om ṭianin hi rammual nitna ringota lungitluk hih thil i-ol tak a nit a. Ifâk-inêk neh inloi vangsak ngaituana ringota lung intluk hih thil i-om thei tak a nit.

Pathianin Ama thu a iring rangin a ne inuam a lei nit a. Hi rammual nitna murdihei hih damsung dai ino rang an nit iti ei ingaitua phâk ngai ino a nit. Building idet tak ei isin hei khom an dai rang ten (guarantee) om an nit a. Richon ei inei neh ei sinthona murdi hih ei ichân tik, neh ei mâk ngêt a nang tik an lai om rang a nit a. Khasikin kumtluang idai ifâk neh richon ei ngaitua masa ngêt a nang a. “Miriam hih ibai bangin ring no nia, Pathian bâia thu suak tinrêngin kêng ring an ti” iti thu hih ei ingaitua nuam a nit.

IBAI: Sinitho a ifâk ifah chu miriam chan a nit tâk a. Baibil rammual a sinthona poimo tak chu loisin a ifâk-inêk invâng a nit. An bu (huit, barli, bu neh hi angkana dang danghei) a rithoka ibai an isiam chu an bu tak ai nit a nit.

Fâk-nêk:

1. Ibai hih Baibil rammual a chu ei mahnin bu ei iti hih a nit a. Miriam ringna ranga ifâk-inêk poimo tak a nit. Atuna ei mahnin ibai ei iti neh ei mang dan ringot hih ai nit ino a nit. Ibai siamna rangin huit, barli, bu neh hi angka chi dang dang hei a di a siamin imang ngai a nit. Rammual rizat ah thingkolkai neh kolkai angkana hei ilua khom bu a mang an om a. Sap ṭonga ‘Cereal’ neh ‘Staple food’ iti chu bu a mang ngai itina a nit.

2. Pumapa Jisua chu Bethlehem (Ibai In) ah a zuang suak a, sakhengah ai zal a nit. Pumapa Jisua chu ringna bai, rithla bu inentirna ai nit a nit.

3. Ibai hin sinitho a ifâk-inêk invang ânentir a.

4. Pumapa Ṭongṭaina a nintin kin rupkan ifâk ne peh roh iti hih a poimo tak tak a. Taksa bu neh rithla bu inentirna a nit. Nintin ei fâk rup ei nang rualin nintina Pathian neh ripôl mai hih thupui masa a nit a. Nintina Pumapa zianga ei iṭul ingen chu ei thupui masa a nit. Nintin taksa ringnun ibuaipuiin ringnun ei imang ngai a nit a. Ei nitna diktak neh ei rithla ringnun bu chu ei ngamringil zoro ai tam ngai a nit.

Mangrua:

1. Miriam ibai banga a ring theino dân isirna a hin ibai iti hih inloi vangsak ngaituana khom ei inhuap theia. Sap ṭong vâng a chu ifâk tino khom miriamin a ringnun a vôna neh artlukna khoma hin ifah/inê iti ṭongkam imang a nit a. Miriam inang ei imang hih ‘consume’ iti a nit a. Atunlai ‘consumerism’ rammual a hin ei imang intam ual ual a nit. Mangrua imang a om hi ‘consume’ iti a nit a. Imang neh ifah/inê iti hih zâi khatka chôi thei, a dingmun izira ṭongbai ei imang ngai a nit a. Rammual richon neh mangrua hei hih ei nang ban imangin, inen/ihapin ei i-omin buaina rikhêl tak tak ei isua tâk a nit.

2. Liakinfak, fâkinruk iti hih thupui ilian tak tak rammualin ai buaipui an nit.

3. Fâk ikhop rei, khopinter khom Billy Graham an thina khop sual a lei iti chu â dik tak tak a. Thupek isômka laia a sarina khan “Iru no roh” a ti a, a sômna khan “Ni bunga hei neinun thîk no roh” ai ti a nit.

4. Ringnun hoinhai neh nunkhohoi imang khom hih taksa nuamlam ifâ a nit a, rithla ringnun inṭam neh inchar ngaitu an init a nit. Khasikin Pumapa Jisuan Johana 6:35 ah “Keima hi ringna bai chu ki nit. Tukhom ki zianga hong kangân chu an vonṭâm no nia; tukhom keima ne iam chu an tuirihâl khâi no nih” ai ti a nit. A nit ngeia Jisua Krista chu rammual zianga ringna petu a nit a. Kros a Krista thina sika Pathian maa thiamichanga rithlaringamna dongtuhei ei nit.

Sinthona:

1. Ei ritha, ei thiamna neh ei lungril ipe letka ei sinthona tinrengah risiakin ei isin ngai chu a nit a. Taksa rammual a hin ringum takka om ei irzûl korong a nit a. Loisin, rikul, sinthona det (kam isin) neh sumpuan manna dang dang sin ei tho a hin ei sinthona ringota lungintluk hih thil i-ol tak a nit a. Hi angka ringnun risiaka ei mang a hin ei rithla bu rang khomin risiak a ṭul tak tak a. Ei nitna diktak iremai ai poimo a nit.

2. Ei rammual hih sumpuan rammual, mafonna neh changkangna rammual; ei inang neh ei imang tamna rammual, ôlnona rammual a nit a. Thuneina, roinpuina, choinrisangna, manlianna, marangṭhat izongin ei rammual hih a irrêl a nit a. Hi laia hin Pathian thu a ei ripêkna rang, ichân rang, ei tuang rang neh Pathian thu ringata ringnun ei mangna rang hei hih ithlei a întak a nit a. Pathian neh ripôl mai bangin izoroah neh idingmun khomah ilom neh thlangam takkan ringnun imang thei a lei init a nit.

KUM SȎMILIKA NEH SUN SȎMILIKA: Taksa neh Pathian mi nitna hih Israelhei khan ithlei intak an ti ngaia, Pathian an ringil zoro ai tam ngai a nit. Pathian thu an zômnona sikin intuang khom an init ngai a nit.

Ritepna 14:33-34 “Nin naihei chu ramchârah kum sômilikah rivâk rivâk an ta, ramchârah nin ruak â tâl zoi phar mâkah chu nin iamom nona khah tuang an ti. Ram va enthlât rangin sûn sômilikah an va thang a, sûnka sik kumkah, a rengkan kum sômilikah ivâi nin ta, kum sômilika sung nin siatna khah nin ituang rang a nit. Khanchu nin chungah ke lung hoinona hin îm ai nit ngai reh tâng nin ti”.

Hi kum sômilikah inriseia an om sûng hin miriam hih ibai bangin ring ngai maka, Pathian baia thu isuakin an ring ngai iti a înlang a nit. Vonṭâm dengthei an ituanga, an lai riat ngai ino, an pi neh puhei lai riat ngai ino Manna a khan Pathianin ai vâi a nit. Khan Israel mipuihein Pathian thun keng miriam an iring ngai iti hih an riatthiam nona ai tam ngai a nit.

Pumapa Jisua Krista Diabola ithlêma om rangin ramchârah Rithlan a ṭhui a, sun sômilika neh zan sômilika bu a ngei tenan chu a von a hong ṭâm tâk a. Diabolan ibai in a thlêma khan ei thupui a hin Pumapa Jisuan ai sâm a nit.

Ripui sika ikalkhuma ei om rang hih sun sômilika chu a hang init phot a nit a. Hi sunga hin Biak In Inkhom fe thei loin ei oma. Fâk-nêk neh ei sinthona neh mophurna dang dang heiah intakna ei isik a nit a. Hi ripui neh ikalkhuma ei i-om hih ei lai riat ngai ino a nit a. Ri-enkol rang dân khom intak ei iti a nit. Hi intakna ei ituang khom hih Pathian tianga risiamna zoro ṭha taka ei mang a nang a. Hi zoro hih Pathian thu hih miriam ringna a nit iti ngaitua inthar nôk zoro tak a nit.

PATHIANIN A MIHEI RIVAN MANNAN Â VÂI:

Pathianin a mihei chu a ithla tlak ngai ino a nit a, an thuzômnona ah inrisein a ziang tiang an kirnôkna ranga ai enkol ngai a nit.

Dânnikna richang ei itep a khan Israel hein ram ithar an chuan ranga khan miriam ringna rifâna thu Pathianin â ril inthar nôk a. Sinitho a ifâk ifah hih a poimo a, khan hi bang miriam ring theina nimak iti iril an nit. Israelhein intakna itam takka an itong khom Pathian thu an riatna ranga Pathian mangrua a nit iti iril an nit a. An pi neh puhein an lai mu ngai ino rivan Manna khom Pathian thu inentirna a nit iti iril an nit.

Atun khom ei rivan Manna Pumapa Jisua Krista a nit a. Pathian thu chu ei ringna ifâ tu tak a nit mai rang a nit.

Israelhei kha an thuzômnona sik neh an mahni fianan ramchârah kum sômilikah Pathianin dengtheinahei khom a întuang a nit. An lai riat ngai ino neh an pi neh puhei khomin an lai riat ngai ino Manna a khan ai vâi a nit. Hi rammual a hin dengtheinahei chu ei ituang nget rang a nit a. Khan ei lomna neh rithla ringamna chu Pathianin a mihei a ithla tlak ngai ino hih a nit. Pumapa Jisua Krista a khan hi rammual hih ei ingam thei a nit. Rammualin a lai riat ngai ino neh ai riat thiam theiino a tuang lai khomin rammual la iriat ngai ino neh rammualin ai riat thiam theiino Pathian thu a rivâi/rifâ theia ei i-om hih a roinpui tak tak a. Pathian lungnethlungna neh enkolna chu ei ring theina san a nit a. Amah neh ripolmai neh a sinitho chu ei bu tui tak a nit.

PATHIAN THU RINGNA:

Pumapa Jisua Krista Soitanan a thlêm a khan ifâk-inêk neh rammual thuneina neh roinpuinan a thlêm a. Pumapa Jisuan a sâmna khatka chu ei thupui “Miriam hih ibai bangin ring no nia, Pathian bâia thu suak tinrêngin kêng ring an ti” iti hih a nit.

1. Johana 6:27 ah Pumapa Jisuan “Ifâk rimang thei zel rizûlin rivâk rivâk no unla, kumtluang ringna dai rang ifâk rizûlin rivâk lem rei. Kha fâk khah Miriam Naipan nangni pêng a ti, Pa Pathianin ani khah risin ai sia tâk a nit,” a ti a.

2. Kros riputa Krista ke nung izui chu ei ringna lampui a nit a.

3. Pathian thu chu ei ke ranga meiser neh ei lampui ranga ivar a nit a.

4. Kristian insungkua maicham chu ei insungkua ringna a nit a.

5. Kristianna hih ei ram neh nam izêk rang tu tak a nit a.

6. Baibil bang hih ei ikan tak a nit a.

7. Pumapa Jisuan “Ne tirtu lungdo sin neh a sin izoi hih ki bu tui tak a nit” ai ti angkan (Johana 4:34) Thurchi Ṭha neh rime ringnun imang ei mophurna lian tak a nit.

8. Krista zuangnokna chu ei itûng, ingâkmo, ei ithlir a nit a. Ei ringnun thupui tak a nit.

Sumpuan rammual, mafonna neh changkangna rammual; ei inang neh ei imang tamna rammual, ôlnona rammual a hin Pathian thu chu ei ringna diktak a nit iti rianfel a ṭul tak tak.

KHARNA:

1. Taksa rammual a lêng, ifâk-inêk neh inloi-vangsakna thu ingaitua ngêt inang ei nit rualin ei nitna diktak neh ei itûng tak Pathian ram ipan ai nit angkan Pathian thu a rifâ hih ei thupui tak ini mai thei rangin ei lungril ei ngaituana siam nôk ei ta.

2. Nintin taksa ringna ei îfâ a ei vangsakna rang ei isinsuak ngai angkan Pathian thu hih ne zêktu tak ini rangin lungril ngaituana Pathian ziangah rilan inthar nôk ei ta.

3. Pathian baia thusuak tinrenga rithoka ring ei nit theina rangin a thu ei irngaia rithokin Pathianin ṭhatnevur riseh! Amen.