Damna (Dannikna 7:15; 30:6; 30:11-14) ~ 7 April 2020

THUMA:

Ei rammual ripuin a soi inning sikin Inkhom khom fe thei khai iloin ei i-om a nit a. “Damna” iti hih thupuiin nei ei ta. “Damna” iti thupui hih “Thina ata Ringna” iti thupui iti khomin ei irngaitua sa rang a nit. Rammual pumpui ripui sikin lunginzingin ai om a nita. Khan iamtu hein chu Pathian iring ei nei sikin ripui laiah khom rithlaringamna neh lungringamna ei inei a nit. Khasikin vuanzana hin “Damna” iti thupui a mangin Pathian thu ei irngai rang a nit.

RICHANG:

“PUMAPA khan nin lâi ata rîrâi tinrêng nangni inrikiang pêk riai a ta, nin lei iriat tâk ngai Aigupta rama rîhei khah nin chungah inlêng nonih; khannisela, nangmani neltuhei chungah chu inlêng a ti” (Dannikna 7:15).

“Nin ring theina ranga PUMAPA nin Pathian kha nin lungril murdia lung nin thlung theina rangin, PUMAPA nin Pathianin nin lungril neh nin richihei lungril iser kha nangni tan pêk a ti” (Dânnikna 30:6).

“Hi thupêk, vuaninta nangni kî pêk hih nin ta rangin a zôm intak rai mak a, riat phak ino rang ai om ino a nit. A thu kin riata, kin zôm theina rangin tûm rivana ne hang ife pêk a, ne hang ilah pek rang? nin tina rangin rivana om ni mak. Kin riata, kin zôm theina rangin tûm tuikhanglian râla ne fe pêk a, ne hong ichoi pêk rang? nin tina rangin tuikhanglian râla om ni mak e. Nin zôm theina rangin thu khan nangni a nai teng a, nin baiah neh nin lungrilah ai om a nit; khasikin zôm rei” (Dânnikna 30:11-14).

I-ONGNA:

Dânnikna rithokin Pathian thu ei irngaitua rang a nita. Dânnikna hi Israel hei Kanan rama an lut rang toa rifo ṭian puma Mosian Pathian thu a irilhei a nita. Kanan ram an lut rang to’n Pathian mi an nitna, Pathianin a ruai maina neh an om rang dan a lei iril chu an riat rangin iril nôk an nit. Ei rammual boiruak mang a rithokin miriam nai hein ei dingmun ei sut nôk tak tak a nang iti ei iriat suak a nita. Biate naihei khomin ei dingmun ei sut nôk ai nang a nit. Ei boiruak mang hin sun nungkhonah ei om tâk iti khom a înlang a nit. Dannikna a thu poimo ual chu Thupêk Soma akhatna “Keima nino chu Pathian dang reng reng nei no roh” iti neh Pumapa Jisua Krista khomin thupêk murdi laia a roinpui tak iti a a isir chu Dannikna 6:4-6 “PUMAPA bang ei Pathian a nit. PUMAPA nin Pathian chu nin lungril murdi, nin ringna murdi, nin râtna murdin lung nin thlung rang a nit”. Miriam murdin Pathian naihei ei nitna ngaitua nôk zoro a nita. Biate naihei hih Pathianin a nerthlangna, sintum neh mophurna a ne ipek hei ngaitua tak tak zoro ai nit a nit.

RINGATNA RICHANG:

Dânnikna 26:16-19 sunga hin Israelhei chu PUMAPA dongtum bîk mihei an nit zia iril nôk an nita. Dânnikna 27:1-10 sunga hin Pathian dân lungpheka riziak neh thupêkhei neh dânhei chu an zôm rang a nit thu iril an nita. Dânnikna 27:11-26 sunga hin thu zôm ino ta ranga vânisâmna neh 28:15-68 sunga hin thu zôm ino man ei imu a nit. Dânnikna 28:1-14 sunga hin thu zôm sika ṭhatvurna thu ei imu a nit. Dannikna 7:15 hin “PUMAPA khan nin lâi ata rîrâi tinrêng nangni inrikiang pêk riai a ta, nin lei iriat tâk ngai Aigupta rama rîhei khah nin chungah inlêng nonih; khannisela, nangmani neltuhei chungah chu inlêng a ti” ai ti a nit. Fesuak 15:26 a ei hingkan riziak ei imu a nit “PUMAPA nin Pathian rôl hi iṭha takka nin ringai a, a mitmuah thil iṭha nin sin a, a thupêkhei nin zôm a, a dân hei murdi nin vongin chu Aigupta mihei chunga rî ki inlêng angkana rî rêng rêng nin chungah inlêng no ning e. Keimah PUMAPA, nangni indamtu ki nit hih”. Pathian thu zôm chu damna a nit. 1999 ata 2003 sung Aizawl Theological College ah Pathian thu riseia ki-om laia khan Lekhabu khatka ki tep a that kiti chu C.I McMillen a irziak “None of These Diseases” iti a nit. Ei richang ringatna Dannikna 7:15 a ringatin a irziak a nit. Pathian Thu zom damna a nit iti chu thupui taka ai nei a nit. Idik khom a dik renga. Dannikna a PUMAPA Pathianin Israelhei dan ai pekhei hih an damna rang a nita, ei ni hei rang khomin izom rang itul an i-om a nit. Entirnan, sa thisen, sapik ripak neh sa fa loi rang itihei chu miriam riselna rangin thamak iti Doctorhei khomin an imusuaka a nit.

Israelhei zianga thuthlung hih an ziang bangah ithlung ni mak a, an richi suanpar la hong i-omhei rang khom a nit (Dânnikna 29:15). Thuthlung Thar huna iamtu ei rang khomin a nit sa. Dânnikna 29:19 ah ireh tianka tuklul ilian rimang rang thu ei mu. Dânnikna 30 sunga hin ringna neh ṭhatvurna lampui inrilang a nit. Pathian zianga kir nôk hei chu inzokin an om nôk rang thu khom ei imu a nit.

EI RANGA DAMNA:

Ei Iṭul tak: Hi sun nungkhon lungzingna neh buaina rammual a ei iṭul tak chu ei ringatna richanga ei imu angkan “ei ring theina ranga Pathian lung ei thlung theina rangin ei lungril iser itan a om” hih a nit. Pathian dongtum bîkhei ei nitna, Pathian mihei ei nitna, ei sintum neh mophurna ilena Pathian lungdo ei isin chu ei ranga damna a nit.

Lungril Iser Itana Om: An lungril iser itan a omhein im an sintum neh mophurna chu an iriatin an izôm thei ngai a nit. “Hi thupêk, vuaninta nangni kî pêk hih nin ta rangin a zôm intak rai mak a, riat phak ino rang ai om ino a nit. A thu kin riata, kin zôm theina rangin tûm rivana ne hang ife pêk a, ne hang ilah pek rang? nin tina rangin rivana om ni mak. Kin riata, kin zôm theina rangin tûm tuikhanglian râla ne fe pêk a, ne hong ichoi pêk rang? nin tina rangin tuikhanglian râla om ni mak e. Nin zôm theina rangin thu khan nangni a nâi teng a, nin baiah neh nin lungrilah ai om a nit; khasikin zôm rei” (Dânnikna 30:11-14). Iamtuhein chu Pathian mi ei nitna neh ei sintum neh mophurna chu iril bâk nang iloin ei iriat thei a nit. Khan ireh ṭiankan tuklul lianna sikin ei nuam lama ei om khoma ite inkhok ino angkana ibe’n rimangna lampui ei irô ngai a nit.

Thu Zomna: Pathian mihei, an lungril iser itana omhein Pathian dân chu an ngaitua a izôm ituma risiamin an izôm ngai a nit. Hi Pathian thupêkhei neh dânhei hih Thuthlung Lui neh Thuthlung Thar a mi ri-ang zoi maka, khan a lungril iser itan a om tu’n hi Pathian thupêkhei neh dân hei hih Baibil ata ai riat suak ngai a nit. Entirnan, ei iti tak angkan; Thupek Som, Sa rithiang neh rithiang ino, Somka khatka, Jubilee nitna neh mang dan neh dang danghei Dânnikna a hin ei imu a nit.

Ithom Ripui?

Sun nungkhon risin: Ripui ei itong hih sun nungkhon risin khom a nit ngeia.

Pathian thu zomno sika. Dannikna a ringatin isir ta rang ei la atunlai ripui ithar hih Pathian thu zôm ino hein ripui sika an tuang rang thu ei imu a thlungna ei iti thei a nit (Dannikna 28:21). Ithom Israelhein Kanan an lua man Kanan mihei umisua an init ei tin chu Israel hein an tho dan an zuino na ranga a nit (Dânnikna 18:12). Miriamin ramsa-izuva hei ei rôn reina sikin rimangphar ranga om an tam thiaia, an ri rivoi ṭhano ten khom ei isut thiai tâk a nit. Ei înlang nuam chu ei ram sung khomah thilsiam hei chunga ei ringnun mang idikno sika hin lam itam takkan vel itam takkah ei lei tuang tâk iti hih a nit. Ram-tui-khomuala ripal ei itam khom hih ingaitua om tak a nit tâk. Koindang thurchi ṭha ife suak pui rang iti a theidor miriam laiah sin ei tho rualin thilsiamhei enkol neh mang rang dan Baibil iti neh Sorkar iti hei ei zôm rang a nit.

Thina ata Ringna: Lungsiat hapta ei imang a nit. Miriamnai thina rammual a leng neh kumtluang ringna nei inohein ringna ei dong theina rangin Pumapa Jisua Krista Pathian Naipan ei rithulin hi lungsiat hapta hih a lei itong a nita. Pathian Naipan ei ranga Krosa a tuangna neh thina sikin kumtluang ringna ei imu thei tak a nit. Miriam hih Pathin nai ini ranga inrifuk a nit. Krosa Krista thina thu iama Pathian maa thiam ichang ranga inrifuk ei nita. Hi Kros thu bang hih miriam ranga ringna lampui a nita. Kros thu hih ei ringnun ringatna tak a nit rang a nit. Thina Laia ringna ei chang theina rangin Pumapa Jisuan hi lungsiat hapta a hin ituangin ei rangin a nungkhonah a ringna ai pek a nit. Atunlai ripui hin ei taksa ringnun ingka dingmun khomah ne thlun sela, ei rithla neh ei iamna tiang chu kumtluang ram a nen nai ual ual rang a nit.

Ei Ram neh Nam Sintum: Sun nungkhon neh Pathian thu zôm no sika ripui ei ituang ei ti rualin ei sintum neh mophurna zôm intak ino, ne nâi teng, ei baiah neh ei lungrila om hih ei zôm rang a nit. Ramsa ru, Saphu Lip, Vadunga ingahei neh Ramsa hei a rifa hih thil idik tak nimak iti ei iriat suak tir tir a nit.

Sorkarin chortual isuak neh inzin a khap a hin ei mahni tiang itam takka ri-enfia rang a ne inngaitua a nit. Sinitho hih mahni kea dingna a nita. Mahni kea dinghein vadung a miringhei neh ramsaheia ringatin iring ai tum ual ino rang a nit. Abikin thingtlanga omhein rikul idet, thei-lung-par, inkola chimu tho, ran ivai hei hih ei-uar tak tak ai nang a nit. Hi sin hei hih khopuia omhei khomin ei ithei khatka khok chu ai om nget rang a nit. Ei iti nuam chu ei sinbthona tak chu takritai neh thatnemringai takkan ei sin rang a nit iti hih a nit. Riseilai khomin arseina chu mahni kea a dingsuaka mi dang rang khoma thatvurna a nit pui theina rangin arsiak nget rang a nit.

Iamtu neh Koindanghein ei risiaminṭhatna rang lampui taksa tiang neh rithla tianga ei iriat hei rivuak loia bozui zoro a nit tâk. Pathianin a ziangah ei kir noka a thu ei zômin chu rithla neh taksa tiang nen dam nôk a ti!

Pathianin ṭhat ne vur inthar rise! Amen!